الفكرة الأساسية هنا معتمدة اعتماد كامل على تبسيط الأشياء، وتفكيكها، وتجزيئها، مش من باب التعقيد، لكن عشان في الآخر نعيد تركيبها بشكل يخلي العقل مرتب ومنظم. العقل زي أي نظام، لما المعلومات تدخل عليه بشكل متشابك ومتلخبط، الناتج بيبقى توتر وتشويش. إنما لما تتفكك خطوة خطوة، الصورة بتوضح، والفهم بيبقى أهدى وأثبت.
في البداية فيه مرحلة اسمها مرحلة الأساس، ودي أهم مرحلة . المرحلة دي بنبدأ فيها بالحاجات البسيطة والأولية، لأنها المفتاح لفهم أي مرحلة جاية بعدها. هنا مفيش اختصارات، لأن الاختصار من غير أساس قوي بيطلع فهم هش. الاختصارات بتبقى مفيدة بس في المراحل المتقدمة، لما تكون بنيت قاعدة ثابتة تخليك تتحرك بمرونة وتفهم بسرعة من غير ما تتلخبط.
علشان كده، البوستات دي مينفعش تتقري بنفس طريقة فيديوهات السوشيال ميديا السريعة، ولا قراءة الجرايد اللي بتعدي عينك على الكلام وخلاص. هي مش معمولة علشان تداعب عقلك شوية وتمشي، لكنها معمولة على إيقاع هادي، وفيها ترابط مقصود، علشان تحتاج منك مجهود تفكير بسيط، ومع الوقت تلاحظ إن عمقك العقلي بيزيد تدريجيًا من غير ما تحس.
التحديث سيطبق